نزار العقلي | جمال فرفور..( مولانا الملك )  المصلح الذي أنهكته الخيبات وافتقد جولة “الحوت

 

 

متابعات – عاجل نيوز

 

دائماً يا جماعة الإشاعة أقوى من الحقيقة و زمان كانوا ناس نادر خضر و محمود عبد العزيز و جمال فرفور اساميهم متصدرة قعدات الونسة و لمات الجبنة، لانهم كانوا في القمة و بسبب القمة دي كانت اسلحة الإشاعة و الغيرة و الفتنة موجهة ضدهم بقوة.

 

بتذكر تماما في نهاية التسعينات كنت وقتها في القاهرة لامن انتشرت إشاعة بتقول إنو فرفور و محمود متشاكلين و بعدها جاء محمود عليه الرحمة للقاهرة زيارة و عزمنا عشاء في شقته بحضور الاستاذ العازف الجميل أمير بشارة و بعد اتعشينا مع الونسة و الضحك و حكاوي بحري الما بتخلص قمنا فتحنا موضوع الخلاف المزعوم فقام محمود ضحك و قال بالحرف الواحد ( دي احلام بعض الناس و فرفور ده آخر زول ممكن يختلف مع زول لانو الزول البيصلح بين الناس ما بيعرف يخاصمهم )

 

كلام الحوت ده كان كافي جدا إنو يختصر شخصية فرفور ، و انا في الحقيقة ما جاي الليلة عشان اتكلم عن فرفور اخو الاخوان و لا فرفور سيد الفزع و المروءة و لا عن فرفور اللاعب الحريف بتاع فريق الصبابي و لا مولانا فرفور القانوني و لا فرفور صاحب المبادرات الإنسانية الما ممكن نحصرها و ما اظن في فنان ممكن يكون سبقو عليها.

 

انا عايز اتكلم عن جمال فرفور المصلح الإجتماعي، فرفور البيدخل بين الناس عشان يلم الشمل و يجمع القلوب و من اكبر الشواهد هي الخلاف الكبير الحصل بين هيثم مصطفى و فيصل العجب، وقتها كل الناس فشلت في إنو تصالح النجمين و نجح جمال فرفور في انو يصلح بيناتهم لانو بي بساطة كده فرفور ما بيعرف يعيش في وسط الخصومة و الخلاف.

 

كل الناس البتعرف جمال فرفور عارفة انو الزول ده حياته كلها مقضيها في ( الجودية ) و في الإصلاح و في لم الناس على الخير و خدمة الناس بدون جوطة و فلاشات، و من المؤلم جدا يا جماعة انو الواحد بيقضي عمره كلو يدافع عن الناس و لامن يجي عليهو الدور ما يلقى زول يدافع عنو .

 

التصرف الحصل من جمال كان نتيجة لتراكمات كتيرة جداً بسبب سكوت و خزلان الوسط الفني لجمال فرفور ، اتراكمت الخيبات و اتوالت الصدمات من ناس مفروض يكونوا اول سند لفرفور عشان كده من الطبيعي جداً انو نشوف التصرف ده .

 

جمال فرفور من مجتمع بحري الما بيعرف يغطغط، فالبحراوية بقولوا للاعور اعور في عينو، و لو في نصيحة بنقدمها لفرفور بنقول ليهو ارجع فرفور الزمان، ارجع لزمن الحوت، وقتها كان لامن يتعرضوا لازمة و مشاكل بيقوم محمود يمشي لفرفور بالليل و يعملو جولة اجتماعية و تفقدية على ناس بحري، حاليا فرفور محتاج للجولة دي و ناس بحري محتاجين ليها برضو.

 

نزار العقيلي