عاجل نيوز
راقدة متسطحة على ظهري وحاسة بتقل رأسي!! وبتذكر آخر مره أنا حسيت بالإحساس ده متين!! فجأة اتذكرت يوم اتخرجت!؟ ويوم استلمت اول راتب لي وسلمتو لأمي وانا رأسي مرفوع!! وتلقائياً ابتسمت!! وللحظة بديت افكر شنو الغريب في الموضوع عشان انا احس بإحساس زي ده؟!
صاااح عبير طيبة وما بتمل من الحديث معاها بس ده ما سبب كافي لاحساسي ده!!
وفي أثناء ما بغالط في نفسي!! ضربتني وعد بعلاقة تلفونها!! وقالت..
_بتكلم معاك انا الباسطة دي حقة منو؟!
نسيت موضوع الصحن! قلت ليها اكلي منها وخلي معاك لناس البيت!! واتلفت علي الحيطة وحاولت انوم!!
ودي الصدمة التانية لوعد!! معقولة ولاء والباسطة وتدي وشها الحيطة!! عارفة قدر شنو انا بحبها!! فغيرت أسلوبها وقالت..
_ولاء انت كويسة؟! من جيتي حاساك ما طبيعية؟
_ابتسمت وقلت، بعد تاكلي اطفي معاك اللمبة!! خليتها في حيرتها!!
في صباح اليوم التاني رجعت لنفس الروتين شاي الصباح، نضافة البيت، ومساعدة امي في المطبخ!!
وقبل ما أمي تطلع علي سوق الخضار وصيتها تجيب شوية حاجات عازمة عبير علي جبنة!! قالت لي شايفاكم بقيتو صحبات!! ابتسمت وقلت زوله طيبة شديد…
قبل الفطور ناديتها بالحيطة صبحت عليها وذكرتها بالجبنة قالت ما ناسية!! ضحكنا وكل واحدة رجعت لشغلها…
بعد الفطور تحديداً جهزت اغراضي وظبطت قعده حلوة بوشار وفنكوش وحلاوة وبلح وتسالي وفول سوداني ومنقة بالشطة!! كانت صينية تفتح النفس!! وعد لم شافتها قالت لي يومي اعزميها عليك الله!!
ضحكنا وفي نفس اللحظة دقت الباب!!؟
دخلت وقالت لي اتناولي الصينية من الحيطة!! لسببين اولاً هي شايلة بتها والتاني لأني اطول منها!!
كشرت وشي ولمتها ليه تجيب حاجة انا العازماها!! وضحكت كالعادة وما ردت علي، قالت الحر ودخلت علي ناس امي!!
لم اتناولت الصينية انبهرت!! قرابة الاتنين كيلو سكر ونص رطل بن وسرويس حق كيك وشبس جاهز ما فنكوش لكن كاباه من اكياسه في صحن ومكسرات، بالجد احرجتني بكرمها!!
دخلت الحاجات وتاني شاكلتها ليه متعبه نفسها!! وامي برضو ما قصرت فيها!! قالت الحالة واحدة ونحن زي وأخواتها وامي بتحسها امها التانية!!
قعدنا واتونسنا وضحكنا والبت الصغيرة حبت ابوي نهائي ما بكت ولا فقدت امها قاااعدة في الصالون مع ابوي لمن نامت!! ونحن لم سمعنا العصر أذن كلنا اتخلعنا!! الزمن فات والونسة حلوه!! قامت جارية وقالت ممازحة عصام حيطلقها الليلة غداها ما شدتو!!
ضحكنا معاها ووعد جابت ليها بتها وطلعنا قدمناها لباب بيتها ورجعنا!! امي في أثناء ما نحن بنتونس كانت في المطبخ وجهزت غدانا، وعد غسلت عده الجبنة وامي جهزت غدا لاسرة كبيرة وقالت لي امشي ارفعي ليها وقولي ليها ما تطبخ دي حاجة بسيطة!!؟
فرحت والله لأنها بتستاهل!! شلت الصينية وناديتها بالحيطة شكلها بعيدة ولا في الحمام الله يكرمكم!!
المهم رفعت الصينية في الحيطة ودخلت بيتها عن طريق الممر البيناتنا!! وما كنت لابسة توب بس جلباب وطرحة في اكتافي!! لاني عارفاها قاعده براها وراجلها قالت بيجي قريب المغرب!!
نزلت الصينية وما دخلت لا البرندة ولا المطبخ! ناديتها من برااا!! فعلا كانت جوو غرفة نومها وما سمعتني!! أبتسمت وقالت لي شنو التعب ده يخسسسي عليكم كان ترفعيهم ساااي ماف داعي للأكل!!
_قلت ليها العفووو الحالة واحدة!
استلمتو مني!!!
_وقالت اممممم الريحة بتشهي!! عصام لو اكل منو تاني ما بياكل اكلي!!
ضحكنا وقلت ليها مجاملة، ياااخ كل شيء من يدك حلووو بالأخص الكيك!!!
_ضحكت وقالت انا شيف حلواني بس!! طبيخ ما بعرف!!
عزمتني علي البيت بس رفضت وقلت ليها..
_شغلة هي يازوله احسن اجيب شنطتي عديل بعده!!
_ضحكت، انا لاقياك وين ما عندي زول اتونس معاه غير بتي وياريت لو بتفهمني!!
_قلت يازوله ابوكم قاعد وبكرة ريم تكبر والبيت يتملي بيكم وباخوانها!!
وفي أثناء ما نحن بنلاطف بعض سمعنا صوت باب الشارع فتح!!
انا اتكبكبت وقلت ليها راجلك جا وانا ما لابسة كويس،
_أبتسمت وقالت لي غريبة لسوء حظك رجع بدري اليوم!! ادخلي المطبخ!!
المزيد من المشاركات
_فعلاََ جري دخلت! جلبابي قصير وانا جسمي شوية مليان م ظريفة نهائي يشوفني كده!!
دخلت وقلبي في يدي وشايفاها السجمانة ياداب مارقة فرختها من الفريزر عشان تفك شوية وتطبخها!! كويس امي رفعت ليها غدا جاهز!!
شفتو بشباك المطبخ جا ناحيتها سلمت عليه من بعيد وجات داخلة قدامو جراها عليه وحضنها من الخلف وانا قلبي هنا بقى هبابة بس!! وخجلت!! منظر زي ده ما شفتو الا في التلفزيون!!
شكلها قالت ليه معاي ضيفة!! كانت بتوشوش ليه! طوالي فكاها وعاين اتجاه المطبخ!!
اتأكدت أنه عرف بموضوعي!!
دخل علي برندتهم وهي استلمت منو اكياس جايبهم معاه وجات علي في المطبخ!!
كانت بتضحك واعتذرت لأنها سجنتني في مطبخها!!
انا تأسفت منها لأني جيت في زمن ما مناسب وكمان بالجلباب!! خبطتني علي كتفي وقالت عادي ما اكون معقدة للدرجة دي!!
شلت منها توبها اللابساه وقلت ليها اصلاً ما حتحتاجي ليه!! ما عارفة ليه قلت ليها كده؟ لكنها إبتسمت وقالت ليييي موووووش وغمزت لي!!
انا خجلت خجل في الدنيا دي! وطلعت براحة رجعت بنفس الطريق الجيت منو وبعد وصلت بيتنا رفعت ليها التوب بالحيطة!!
امي قالت لي شايفاك اتعودتي!! امس جاية انصاص الليالي والليلة متلصقة بهناك!! الزول ما يبقى عبيط!! ضحكت بس ودخلت غرفتنا!! اقول ليها شنو؟ يمكن يكون عندها حق!!.
وانا راقده وبفكر في الشي الشفتو بالجد نفسي كتم!! وبشهق لكن بغلبني ازفر!! واتبسم سااااي!
وعد قالت لي هوووي مالك فرحينا معاك!!
_ قلت ليها ما شغلتك خليك في قرايتك!!
كانت ممتحنة، بتقرأ في جامعة شندي لغة انجليزية، كانو شغالين اونلاين لكن شكله ياداب الدراسة بدت تستقر!!
ما كترت معاي ظاهر عليها مضغوطة!! وفي اللحظة ديك اتصلت علي اختي الأكبر مني متزوجة في الدامر!! اتونسنا شوية واديتها امي!!
وانا راجعة علي غرفتي اشوف التوب لسسسه في محله!! جيت علي الحيطة عايزة انزلو لوقت ما اصادفها ارفعو ليها بس وانا ماده يدي عليه التوب نزل!!؟ ما بعرفو وقع ولا في زول نزلو؟! ضحكت! وقلت ليها افتكرتك نسيتيهو وكنت عايزة انزلو!! لمده عشرة ثواني ماف زول رده!! استغربت!! وقبل ما اتحرك من مكاني قال لي انا عصام إذا حابة ممكن أنادي ليك علي عبير!! انا رأسي تقل وحسيت بدوخة حرفياََ!! بالجد والله حصلت لي حاجة ما طبيعية!! قلت ليه لا!! ورجعتا بجرجر رجولي وبقول متين اصل سريري!!
وما صدقت وصلت؟! نفس خفقان أمس، نفس الأحساس، نفس الخوف والفرح الغير مبرر؟! ختيت يدي علي قلبي!!
اتاريها وعد مركزه معاي!! قالت لي دي امور جديدة موووش؟!
كنت بعاين ليها بس ما مستوعبه كلامها وبحسو بعيد!! بس سمحت ضحكاتها وهي بتقول والله انتِ جنيتي!!
الله يستر من حالتي والله يستر من الخطر علي بالي!!
لالا مستحيل أفكر انا ما كده ولا دي أخلاقي!!
استكنت شوية مع نفسي وراجعتها!! وقمت اخدت لي دش!! وانا بتحمم شفت منظرهم وهم حاضنين بعض وكأني بحاول يقبل أذنها وهي بتدلع وبوشوش ليه في أذنه!! وكأني بديت احضت في نفسي ولا انا بعمل في شنو؟!
كفتت نفسي واستعذت من الشيطان بصوت عالي وانا في الحمام!! وطلعت وانا متوترة الصراحة!!؟ لأنه حالتي ما بتتفسر!!
المساء بعد العشاء عبير رنت لي وطلبت اجي اتونس معاها لأنه راجلها ماشي يحضر مبارة لريال مدريد وما حابة تقعد براها!!
اتحججت ليها بكم عذر ورسلت وعد بدلي!!
لازم اعرف انا مالي والبحصل معاي ده شنو وسببه شنو؟!
نواصل بعدين
♥️♥️هكذا هي الحياة …
تحمل في طياتها الكثير من الأقدار ..
حلم يتحقق وحلم يتعثر …
لقاء بلا موعد .. وفراق بلا سبب …
لا البدايات التي نتوقعها ولا النهايات التي نريدها …💔
وتستمر الحياة بحلوها ومرها ..♥️♥️
تصبح علي خير
يتبع……
