شهادتي لله من ود مدني | مواطن يرؤي قصة أقرب للخيال | كيف ضاعت ممتلكاته المشفشفة بعد أن عثر عليها
عاجل نيوز
عن تجربة بعد عودتي للمدينة عانيت معاناه كبيرة لإكمال البلاغات أولاً النيابة دايرة 2000 جنيه كاش ولا يقبل أي تطبيق وعند الأقسام إلا تدفع للمتحرين بحجة أنهم لم يصرفوا منذ 14 شهراً وإجراءات تقيلة لو بقيت محظوظ داير يومين.
يقولوا ليك في معروضات في الحظيرة والأقسام. تجيء الحظيرة يرفضوا يدخلوك يقولوا عندهم شغل تاني تعالوا يوم الأحد القادم ويكون اليوم ثلاثاء تنتظر للأحد وتجي حسب كلامهم من الصباح
يقولوا تعالوا بعد عشرة صباحا تمشي وتجي يقولوا ليك حداشر تنتظر لي حداشر يقولوا جاتهم تعليمات مافي دخول إلا الأحد القادم أها لو عندك واسطة بتخش ولو كمان زول عادي تجي الأحد.
أنا شخصياً احتجيت بأن المسألة كده ما كريمة على المواطنين قالوا انت داير تعمل لينا جمهرة ومظاهرة وتكلموا معاي بغلظة شديدة بعد داك جاء صول وقال اقيفوا لي صف والزمن المسموح بيهو عشرة دقائق بس وتطلع مع العلم ان المعروضات كتيرة شديد،
المهم في الأوسط اتعرفت على بعض مقتنيات البيت منها مكيف نسمة متحرك واسطوانات غاز وأقسم بالله العظيم حالف بيني وبين نفسي ما اشيل حاجة إلا حقتي المهم قلت ليهم الحاجات دي حقتي قالوا لي بلاغك على وين؟
قلت عويضة! قالوا لي أمشي جيب خطاب وفعلا رجعت عووضة وجبت الخطاب وجيت الأوسط قالوا اخش للبلاغات خشيت البلاغات قالوا أمشي للنقيب جيت للنقيب قال السجلات مشت!
سألت منو الماسك السجلات؟ قالوا ما جاءاليوم رجعوني للصول قال امشي لي واحد تاني رقيب أول مشيت قالوا طلع النيابة رجعت للصول قال امشي مدير القسم مدير القسم قال خلاص تعال بكرة من الصباح قلت وايش يضمن لي الحاجات تكون موجودة؟
قال لي مافي زول بشيلها مشيت وجيت الصباح برضو بعد محاولات عديدة حتين لميت في الماسك السجلات لامن المقدم زهج مني جيت لمسئول السجلات مسك الورق ورجع للضابط قال ليهو الزول ده قال المكيف حقو ومعاهو اسطوانات غاز قال لي المكيف جاء سيدو وشالو!!
المزيد من المشاركات
بمنتهي البساطة.. قلت ليهو أنا أمبارح كنت خايف من السيناريو ده وكلمتك. قال لي اعمل ليك شنو؟
ونهرني خلاص اعمل ليهو منازعة مع صاحب المكيف (صول في الاستخبارات) قلت ليهو طيب موضوع المكيف خليهو النبقي على اسطوانات الغاز قال وعرفتها كيف حقتك؟
قلت حقتي والدليل أنهن كتار وأنا بس قلت الخمسه حقاتي وأنا فاقد سبعة قال للعسكري وديهو لي وكيل النيابة وخليهو يحلف القسم ويجيب شهود.
جبت الشهود قام حولني لي واحد تاني قال ليهو امش معاهو خليهو يتعرف على اسطواناتو مشيت لقيت كل الاسطوانات الاتعرفت عليها بالأمس مكتوب فيها بالشيني تم (التعرف) يعني ماحقتي والعسكري خلاني واقف زي الأهبل وما اشتغل بي.
طلعت من القسم محتسباً كل منزلي وتجارتي عند الله وما ظنيت تاني أرجع افتش لي حاجة.
بي امانة تملكني شعور بأن القوات النظامية غير متعاونة وأي حاجة ذات قيمة بقولوا ليك شالها سيدها.
والله يا إخوان تأملنا خيراً بعد الحرب لكن يبدو أننا لم نتقدم خطوة للأمام ونفس الذي كان يحدث سابقا يحدث الآن وبحذافيره.
فيما يختص بملف المتعاونين العمل بطئ وتشوبه شبهة فساد. غايتو أنا شخصيا غير راضي عن البيحصل.
وهذه شهادتي لله
