معاناة ومأساة وقصص أقرب للخيال | أسير لدي الدعم السريع يحكي تفاصيل عام ونصف العام قضاها في الاسر وطريقة هروبهم
عاجل نيوز
يكشف الاسير الهارب عن تفاصيل لايمكن تصورها او ان تتوقعها ان تحدث اليك معاناة وماساة وقصص أقرب للخيال : لما اسروهم كان عدد الدعامة كبير جدا في المصفاه،
كنا قاعدين في حوش يقع بين الجبل والمصفاه، الحراسة كانت بالمناوبة مافينا واحد بفكر يطلع.
كانوا الدعامة عايشين في نعيم، المواد الغذائية بتجيهم بالدفارات، للعصاير والمياه المعدنية.
لكن بعد تقدم الجيش وقطع الامداد كانوا ياكلوا من المخزون ونحن بدونا شعيرية بملح.
واي قوة تطلع من الجماعة ديل ما كانت بتجينا راجعة العدد ماشي في نقصان عددنا كبير جدا داخل المعتقل بالرغم من انهم يومي بقتلوا مننا 2 أو 3 .
وكان لمن تجيهم زخيرة بفرغوا صناديق الزخيرة ويدخلوا فيها افراد من المعتقلين بعد نص ساعة يفتحوا الصناديق ويقولوا لينا تعالوا ادفنوهم.
الجيش شغال فيهم ضرب شديد يوووومي المدفعية والطيران بضربوا فيهم وبجوا ينادونا ندفن موتاهم والله كمية الناس الدفناها دي كبيرة شديد،
وظل العدد ماشي في نقصان، ملحوظ وظاهر جدا وزي ما قلت ليكم اي جماعة يطلعوا تاني رجوع مافي.
المزيد من المشاركات
طبعا حاجات الاكل كلها خلصت تبقت ليهم بس الشعيرية ودقيق معتت وبقوا ياكلوا معانا نفس الشعيرية بالملح، زمان بختوها لينا زي الكلاب.
اها بعد العدد بقى بسيط نتيجة للقتل الذي أحدثته فيهم القوات المسلحة وباعداد كبيرة نحن فكرنا نتخارج بقينا مراقبين تصرفاتهم…
الجماعة ديل الشئ الوحيد المتوفر ما خلص عندهم الحبوب المخدرة من يبلعوها بقوموا يضربوا سلاح تقيل نظام نحن صاحيين ولا ارهاب لينا ماعارف،
المهم بنعرفهم خلاص بره الشبكة ومافي مناوبة لانه العدد بسيط، اها بمشوا ينوموا تاني الا الصباح.
عقدنا اجتماع براااانا مجموعة من المعتقلين وقلنا نجرب الهروب خصوصا الناس ديل بقوا يفتشوا للطريقة البتخارجهم هم ذااتهم،
وصراحة بقوا ما شغالين بينا كتير.. اول مجموعة ح تهرب كانت 30 فرد…
الطريقة والطريق الطلعوا بيه ده خلوه سر عشان الورانا يطلعوا بيه… اها ال30 ديل مشو وطبعا لو قبضوهم برجعوهم لينا ويصفوهم قدامنا عشان مانفكر نهرب.
جماعتنا الهربوا ما جونا ولا الدعامه فقدوهم داخل المعتقل، ياخ زمان المناوبة بالحساب تسلم عدد المعتقلين السلمتك ليهم.
اها بعد ال30 بنفس الطريقة والطريق طلعنا نحن19… الطريق شاق وصعب لكن ما اصعب من المآسي الجوه المعتقل وعندنا ناس كمية ماتت جوه المعتقل من الجوع.
لكن ابشركم ماتسمعوا المصفاه صعب والله الناس ديل هناك انتهوا جوع وخوف ونقصان في العدد يووومي ومافي اي امداد بدخل ليهم… الطيران اشتغل فيهم ابادة بندفن في حفرة واحدة بالعشرات.
